ᨅᨑ ᨕᨛᨃ ᨄᨄᨗᨅᨒᨗᨊ ᨕᨘᨉᨊᨗᨕᨙ

 

Baraq engka pappibalinna uddanié

ᨕᨛᨃᨀ ᨆᨕᨗ ᨈᨛᨈᨚ ᨑᨗ ᨓᨗᨑᨗ ᨈᨔᨗ

ᨈᨘᨍᨘ ᨆᨈ ᨆᨉᨙᨌᨙᨂᨗ ᨓᨗᨑᨗᨊ ᨅᨗᨈᨑᨕᨙ

ᨕᨘᨈᨂ ᨆᨊᨛᨔ ᨅᨚᨅ ᨈᨅᨛᨔᨗ

ᨅᨑ ᨕᨛᨃ ᨄᨄᨗᨅᨒᨗᨊ ᨕᨘᨉᨊᨗᨕᨙ

ᨕᨘᨈᨘᨈᨘ ᨔᨉ ᨊᨕᨗᨑᨗ ᨕᨂᨗ

ᨕᨘᨔᨄ ᨕᨉ ᨕᨉ ᨓᨗᨋᨘ ᨕᨈᨗᨆᨘ

ᨉᨙᨁᨁ ᨀᨑᨙᨅ ᨆᨕᨘ ᨔᨗᨒᨄ

ᨉᨙᨁᨁ ᨓᨙᨑᨙᨀᨉ ᨕᨆᨚ ᨔᨗᨍᨀ

ᨊᨑᨙᨀᨚ ᨆᨙᨆᨛ ᨕᨛᨃ ᨆᨘᨄ

ᨅᨈ ᨅᨈᨆᨘ ᨑᨗ ᨊᨗᨕᨀᨘ

ᨑᨁᨔᨙᨒᨆᨘ ᨑᨗ ᨄᨉᨛᨊᨘᨕᨀᨘ

ᨕᨁᨊ ᨁᨕᨘᨀᨘ

ᨆᨘᨕᨔᨛᨆᨗ ᨄᨒᨙ ᨅᨚᨂ ᨅᨚᨂ

ᨕᨗᨐ ᨆᨊᨛ ᨄᨄᨗᨉᨙᨌᨙᨀᨘ ᨑᨗ ᨕᨒᨙᨆᨘ

ᨆᨘᨕᨔᨛᨆᨗ ᨒᨙᨌᨚ ᨒᨙᨌᨚ ᨕᨉ

ᨔᨗᨊᨗᨊ ᨓᨙᨑᨙᨀᨉ ᨆᨌᨛᨊᨗᨀᨘ

ᨔᨘᨀᨘᨊᨗ ᨄᨀᨘᨒᨙᨕᨀᨘ

ᨔᨀᨛ ᨈᨚᨊᨗ ᨑᨙᨔᨚ ᨑᨙᨔᨚᨀᨘ

ᨊᨕᨙᨀᨗᨕ ᨆᨘᨅᨚᨀᨚᨑᨗ ᨄᨅᨙᨑᨙᨀᨘ

ᨄᨛᨔᨊᨗ ᨔᨗᨕ ᨕᨘᨈᨗᨓᨗ. ᨄᨛᨉᨗᨀᨘ

ᨕᨘᨓᨒᨘ ᨊᨗᨕ ᨆᨉᨙᨌᨙ

ᨓᨑᨛᨀᨛ ᨒᨙᨈᨙ ᨑᨗ ᨄᨆᨔᨑᨛ

ᨅᨚᨀᨚ ᨒᨗᨅ ᨑᨗ ᨆᨍᨙ

Transliterasi:

Engkakaq mai tettong ri wiring tasiq

Tuju mata madécéngngi wirinna bittaraé

Utangnga manessa bombang tabbessiq

Baraq engka pappibalinna uddanié

Ututtung sadda nairing anging

Usappa ada-ada winru atimmu

Déqgaga karéba mau silappa

Déqgaga wérékkada amo sijakka

Narékko mémeng engka mupa 

Bata-batammu ri niaqku

Ranggasélamu ri paddennuakku

Agana gauqku

Muasemmi palé bonga-bonga

Iyya maneng pappidécékkuq ri alému

Muasemmi lécco-lécco ada

Sininna wérékkada macennikku

Sokkuni pakkuléakku

Sakkeq toni réso-résoku

Naekia mubokori pabbéréku

Pessanni sia utiwi peddiku

Uwalu niaq madécéng

Warekkeng lété ri pammassareng

Bokong limbang ri majéng